隔壁嬸婆無生半個查某囝

隔壁嬸婆無生半個查某囝========京城

紅磚仔壁的戶定跤
成群結隊的狗蟻
爬對壁角,搬著一隻死拉牙
嬸婆失神失神坐佇遐
手捧一塊空碗等欲食。
伊有三個後生,無生半個查某囝
隔壁嬸婆著是按呢過生活。

大漢後生的頭一擺
談戀愛著失敗
打擊傷大,予白頭毛送黑頭毛真不該
隔壁嬸婆傷心,欲按怎
嘛毋知

第二後生毋成材
佮人舉槍學做歹
搶銀行彼一擺
即馬蹛佇籠仔內。

第三後生嘛是害
強力膠是伊的上愛
不時馬西馬西,啥物攏毋知
警察仔三不五時對厝仔來。

隔壁嬸婆無生半個查某囝
後世人只有 酸摻鹼
一生佮苦做伙 天注定。

隔壁嬸婆偌有生查某囝
即馬應該抱外孫 惜命命。